Esta actriz italiana encarnó a l'Anna Schmidt prindada pol so amor p'hacia Harry Lime nuna de les meyores interpretaciones de la so carrera cinematográfica. El so nome real yera Alida Maria Laura von Altenburger. Escomenzó nel cine como estra na adaptación d'El sombrero de tres picos, de Pedro Antonio de Alarcón, dirixida por Mario Camerini en 1936. Intervino en numberoses comedies y drames hasta que la obligaren a retirase durante un tiempu por negase a contribuyir en películes qu'ella consideraba propaganda al serviciu de Musolini.
El productor de cine David O. Selnick contrataríala como protagonista pa El proceso Paradine, dirixida por Hitchcock. Selnick volvió a requerir la so aportación n'El tercer home, onde fizo'l so papel más recordáu. Tres d'otros títulos, como La montaña tráxica, con Glen Ford, l'actriz concluyó'l so periplu internacional y regresó a Italia, onde dirixida por Luchino Visconti encarnó a la condesa Livia Serpieri en Senso. Passolini dio-y un papel destacáu n'Edipo rey y Antonioni fizo lo propio n'El gritu. Depués sedría la musa de Bernardo Bertolucci, que-y dio papeles en La estratexa de l'araña, Novecento y La lluna. Valli siguió apaeciendo en dellos filmes hasta 2002, cuando intervién nel thriller Selmana Santa. Morrió'l 22 d'abril de 2006 en Roma.
No hay comentarios:
Publicar un comentario