EL TERCER HOME / Entrevista a Carol Reed por Charles Thomas Samuels

Carol Reed

Entrevista espublizada n'Encountering Directors (ochobre de 1971)

C.T.S.: Afirmó usté que gran parte de la maestría d'El tercer home allúgase nos sos esteriores. Si d'usté dependiera, ¿rodaría siempres n'esteriores?

C.R.: Sí. Tuvi qu'enfrentame a una poderosa oposición pa viaxar a Viena con El tercer home. Naquella dómina, unu nun llevaba a los actores de viaxe. Pero ehí tenemos un exemplu d'hasta qué puntu esti negociu ta apoderáu pol dineru. Si tienes cinco selmanes pa rodar esteriores, sabes que tienes de consiguir rodar tolos tos planos nesi períodu. Teníemos una unidá diurna y una nocherniega. Los actores qu'utilizábemos de nueche nun trabayaben de día, y viceversa. Trabayábemos d'ocho de la tarde a cinco de la madrugada. A les cinco, díbemos pa la cama, llevantábemos a les diez, trabayábemos cola unidá de día hasta les cuatro y depués volvíemos chanos hasta los ocho. D'esa manera consiguíemos facer el doble de trabayu na mesma cantidá de tiempu. Resulta un pocu agobiante, pero ye meyor eso que nun consiguir tolo que quies y tener qu'iguar depués nel estudiu. [...]

C.T.S.: Anque delles de les sos películes son estraordinaries, escasamente fuxen de los métodos habituales... con una esceición. A usté gústen-y los finales desdichaos. ¿Tratase d'una rebelión consciente contra les fórmules comerciales?

 C.R.: Unu siempres tien que facer lo que-y presta, y confiar en que lo que-y presta sía, amás, comercial. Solía recibir numberoses crítiques polos finales murnios de les mios películes. En cierta dómina pensábase que toles hestories teníen de terminar con un besu por que la xente colara contenta, pero cunto que nun teníen esi efectu. Una película tien de terminar como tenga de terminar. Creo que nada nesta vida tien un final “correctu”. [...] Graham Greene quería que Joseph Cotten adelantrara a Valli con esi coche; asina, la película podría terminar cola pareya caminando pela carretera. Pero yo insistí en qu'ella pasara de llargu. 

C.T.S.: ¿De quién foi la idea de contratar a Orson Welles pal papel de Harry Llime?

C.R.: Foi mía. Una nueche taba cenando con Orson. Acababa de recibir la sinopsis de Graham Greene, y pensé que taba bien, polo que-y dixi a Orson qu'había nella un papel maraviyosu pa él. Quixo lleelo, pero díxi-y: “Escucha, el guión nun ta llistu tovía, pero toi seguro que te va gustar, y eso que nun apaeces hasta aprosimao la metá”. Y él repunxo: “Personalmente, preferiría apaecer al cabu de les dos terceres partes”. En pasando una selmana llegóme la revisión de Greene, y aceptéla. Daquella, David Selznick quería que rodara Tess of the D'Urbevilles, lo que nun me pruyía enforma. Tenía un guión qu'a los dos paecíanos abondo malu, polo que-y dixi que lo fixera revisar y que mentanto me dexara siguir con El tercer home, yá que se trataba de daqué que podíamos espachar con facilidá. Díxi-y que quería a Orson Welles y a Cotten, del que sabía que tenía un contratu con Selznick, al igual que Valli. “Cuenta con Cotten y con Valli”, dixo él, “pero non con Orson”. [...] Selznick quería de toes toes que Noël Coward fixera'l papel de Harry pero, ta claro, eso fuera un desastre. Siguíamos aldericando ensin llegar a nenguna conclusión. Cuando empecé a rodar la película, Selznick entá siguía pensando en Noël. Sicasí, a Alexander Korda, el productor, nun-y importaba, polo qu'a la fin consiguí a Orson. [...] 

C.T.S.: ¿Nun intentó dirixise a sigo mesmu?

C.R.: Namás me punxo dificultaes no referente a la fecha d'entamu del rodaxe, cuntándome lo ocupao que taba con esto y lo otro, asina que-y dixi: “Escucha, vamos tar cinco selmanes rodando esteriores. Cualesquiera d'eses selmanes ye tuya, namás que nos avises con dos díes d'antelación. Y acutaría una de les próximes siete selmanes pa tomes d'estudiu”. Atúvose a ello. Una mañana, baxó del tren en Viena y a les nueve de la mañana yá rodáremos el so primer planu. “¡Dios miu!”, dixo, “¡Asina se faen les películes!”. Travesó caminando'l Prater, espetó-y un par de frases a Cotten y yo díxi-y: ”Vuelve al hotel y almuerza; tenemos qu'empezar a rodar nes alcantarielles. Voi Unviar a daquién a recoyete”. “¡Perbién! ¡Estupendu!” Total, que baxa a les alcantarielles y diz: “Carol, yo nun puedo facelo. Nun puedo trabayar nuna alcantariella. ¡Soi de California! ¡El mio gargüelu! ¡Tengo tantu fríu!” Díxi-y: “Escucha, Orson, podíemos rodar el planu nel tiempu que tamos perdiendo con esta conversación. Tou cuanto tienes que facer ye ponete ehí, mirar p'hacia tras, ver que t'escuerre la policía, volvete y echar a correr”. “Carol”, díxome, “fai'l favor, busca a otra persona pa rodar esta parte. ¡Nun puedo trabayar nestes condiciones!” “¡Orson, Orson, tenémoslo tou preparao! Quédate ehí un momentu”. “¡D'alcuerdu, pero dáivos priesa!” Y entós, esvió la mirada, volvióse y echó a correr internándose nes alcantarielles. De sópitu, oyí una voz que dicía, “¡Nun cortéis! ¡Vuelvo!” De manera que vuelve corriendo al traviés de la corriente, párase baxo una cascada que-y cai sobro la tiesta (¡tou esto fuera campu!) y ponse a facer toa triba de coses, hasta que sal d'ellí pingando. “¿Qué tal tuvo eso?”, pregunta. “¡Fantásticu! ¡Espléndidu!”, dixi yo. “D'alcuerdu. Voi tar nel hotel. Llamáime cuando faiga falta”. Con Orson, tou tenía que ser un drama. Pero nunca hubo discutinios de nengún tipu. 

C.T.S.: ¿A quién se-y debe la maraviyosa idea de la presentación de Harry, afayáu por culpa del gatu?

C.R.: ¡Dios miu, los gatos! Tou eso improvisóse. [...] Esmolecíame la escena de Harry nel vanu de la puerta. Nun quería que Cotten namás pasara al pie de él y viéralu, porque entós el públicu nun sabría quién yera l'home de la puerta. Asina que cuando Cotten lléva-y flores a Valli, yo punxi un gatu na so cama; un gatu col que Cotten intenta xugar sirviéndose del cordel qu'envolvía'l paquete. Pero'l gatu da media vuelta y salta de la cama. 

C.T.S.: Al igual que Valli, que tampoco reacciona.

C.R.: Esactu. Depués, el gatu sal pela ventana. Mientres xugaba con él, Cotten, siguiendo les mios indicaciones, dicía-y coses al gatu. Y entós facía-y dicir a Valli: “Namás-y gustaba Harry”. De siguío, miramos pela ventana y vemos a un home que baxa pela cai ya introduzse nel vanu d'una puerta. Que nós sepamos, pue ser cualesquier. Pero'l gatu, al dir escontra él y xugar cola buyeta del so zapatu, revélanos que se trata de Harry. [...] 

C.T.S.: Davezu, el diañu representase con forma de gatu, o acompañáu por un gatu. ¿Foi daqué asina lo que-y suxurió la escena?

C.R.: Non. Cenciellamente, gustábame la idea d'un gatu namoráu d'un villanu: ¡qué encantu nun tendría'l tipu! Amás, quería que Cotten glayára-y a Harry ensin saber lo que yá sabía'l públicu, esto ye, quién hai realmente nel vanu. 

C.T.S.: Otra decisión brillosa de la película ye la música de cítara. ¿Cómo se decidieron por Karas?

C.R.: Mientres los rodaxes d'esteriores. [...] Mientres los mozos descargaben, yo diba a una tienda y mercába-yos vinu. Cerca d'ellí había un diminutu local onde tomar cerveza y salchiches, con un patiu nel qu'había un tipu tocando la cítara por que-y echaren monedes. Yo nunca oyera'l soníu d'una cítara hasta entós, pero paecióme un instrumentu peculiar, y preguntéme si nun podríemos emplegar esi únicu instrumentu pelo llargo de tola película, especialmente si tenemos en cuenta que la cítara ye típica de Viena. Una nueche, díxi-y a Karas que viniera al mio hotel. Tuvo tocando unos venti minutos. Depués, llevé la grabación d'aquello al estudiu por si la música (tal qu'asocede dacuando) nun encaxara col diálogu, pero polo xeneral paeció que diba bien. Karas vieno vivir a Llondres. Yo tenía una moviola con un duplicáu de la película, lo que nos dexaba acoplar la so música a fragmentos de l'acción. Una nueche pidióme que volviera con él pa escuchar una nueva melodía que compunxera, lo que depués dio en llamase la "Tema del Tercer Home”. “¿Por qué nun tocasti eso antes?”, pregunté-y. “Va quince años que nun lo toco”, dixo él, “porque cuando toques nun café naide se molesta n'escuchate... y pa esta melodía fai falta esforciase colos deos. Prefiero Viena, Viena, y esa clase de coses que pues tar tocando tola nueche y comiendo salchiches el mesmu tiempu”. A la fin, resultó que compunxera la melodía él mesmu, pero que tuviera a puntu d'escaecela. Lo que volvió llocos a otros intérpretes de cítara, pues nun entendíen cómo podía facelo, ye que primero tocaba la melodía y depués, con un auricular, la regrababa añediendo terceres. Nengún citarista pudiera facelo poles bones. 

C.T.S.: Otru rasgu notable d'El tercer home, por más que yá s'alvierta en Odd Man Out (Llarga ye la nueche), ye l'afición que demuestra polos planos inclinaos. ¿Tratase d'un efectu fechu a posta?

C.R.: Confío en que nun se note. Con ello pretendo consiguir que'l públicu siéntase incómodu. [...] Recuerdo que William Wyler, tres de ver la película, regalóme un nivel. “Carol”, díxome, “la próxima vegada que ruedes una película, faime'l favor d'instalalo sobro la cámara, ¿quies?"