LA NARRACIÓN COLA QU’ENTAMA LA PELÍCULA

Nun llegué a conocer l’allegre Viena d’enantes de la guerra, cola so música de Strauss y el so encantu máxicu. Conocíla nel periodu del mercáu negru. Ellí vendíen de tou y yera posible mercar lo que fuera si se teníen perres pa pagalo.

Aquel comerciu fácil yera una tentación pa la xente aficionao. Pero los profesionales quitábenlo pronto d’en mediu. Viena taba dixebrada en cuatro zones: L’americana, la inglesa,la rusa y la francesa. Pero, el centru de la ciudá yera internacional, baxo control policial de les cuatro naciones. Les patrulles taben formaes por cuatro homes: Unu de caúna de les potencies ocupantes. Yeren estranxeros y falaben idiomes estremaos. De toles maneres, nun se portaren mal.

Daquella, Viena asemeyábase muncho a otres ciudaes europees. Bono, un poco destruyida poles bombes, quiciás. Pero yo quería fala-yos d’un americanu nomáu Holly Martins que llegó a la busca d’un amigu, un tal Lime, Harry Lime.

Martins afayábase ensin dineru nin trabayu y Lime prometiéra-y un empléu, polo que se presentó en Viena, feliz y contentu.

EL TERCER HOME, HOMENAXE DE JOSÉ FELICIANO EN VIENA

N'agostu del añu pasáu'l cantautor puertorriqueñu José Feliciano baxó a les alcantarielles de Viena, col envís de rodar un vidiu cola melodía d'El tercer home. Arriendes d'ello, coincidiendo esa fecha colos 60 años del estrenu en Llondres de la película de Carol Reed, Feliciano presentó xunto a les autoridaes del Ayuntamientu Viena un sellu austríacu dedicáu a la cinta que protagonizara Orson Welles.

VIENA, LA OTRA PROTAGONISTA DE 'EL TERCER HOME'

Nun hai alcuerdu unánime sobro'l personaxe que captura más atención del espectador n'El tercer home, si bien la mayoría coincide n'Orson Welles col so perllográu papel d'un cínicu Harry Lime. Otra xente defínese por Joseph Cotten o por Alida Valli. Háilos que se queden con Trevor Howard. Pero, de toes maneres, en dalgo coinciden tolos que ven la película, nel protagonismu de la ciudá de Viena. Parcialmente destruyida y apinada d'escumbriaes y edificios quebraos, la capital austríaca supunxo l'escenariu perfechu pal thriller de Carol Reed, con esi xeitu ente realista y al empar escuru. La Viena d'El tercer home aporta l'ambientación más afayaíza pa describir a la Europa de posguerra y a piques d'entrar na Guerra Frío.

Na dómina en que se plantega la fechura d'esti film dase un fechu bien relevante; la Segunda Guerra Mundial camudara la vida de munchos directores, productores y escritores, como fuera'l casu de Carol Reed, que trabayara na unidá de documentales del exércitu británicu, mentantu que'l novelista Graham Green fuera espía contratáu pol serviciu d'intelixencia del mesmu país. Taba claro que la fin de la contienda, en 1945, diba ser bona fonte de trames pa la lliteratura y el cine.

El proyectu d'esta película financiábenlu l'estadounidense David O. Selznick y l'húngaru Alexander Korda. El primeru quería rodar en Berlin pero según Reed yera meyor aprovechar la escenografía natural de la posguerra, y la capital del Reich taba nun estáu perllaceriosu. Entós Korda propunxo Viena, una ciudá que se facía de toes toes a los pidimientos de la hestoria a cuntar y que, per otra parte, coincidía col Berlín derrotáu nel aspectu de la cuatripartición alministrativa del territoriu. El tiempu certificó lo acertao d'esa decisión.