GALERÍA DE LA PELÍCULA

L'ABEGOSA CONTRATACIÓN D'ORSON WELLES

Tres de considerar dellos nomes pensóse n' Orson Welles como l'actor afayaízu pal personaxe de Harry Lime. Por embargu, la so contratación foi daqué enguedeyao. L'hermanu del productor Alexander Korda marchó a Italia a la busca de Welles, que se topaba ellí trabayando nes representaciones teatrales de la so adaptación del "Otelo" de Shakespeare. Afayalu resultó difícil pues dedicóse a dir d'un puntu a otru d'esi país hasta que, a la fin, Korda pudo dar con elli en Cannes, Francia, y convencelu pa que participara na película.

Comentóse que, cuando'l productor colaba con Orson Welles nel so avión priváu camín de los estudios llondineses onde se rodaría parte del fim, ésti fízo-y una falcatrúa. Polo visto Welles púnxose a caciplar na cesta de fruta que Korda traxera d'Italia, dándo-y un solu muerdu a cada pieza, de manera que cuando baxaron la cesta aquello ya yera incomible. Sia verdá o non, l'anécdota cuadra cola forma ser de Welles, que diba facer del so personaxe l'auténticu centru de la película.

EL TERCER HOME / Entrevista a Carol Reed por Charles Thomas Samuels

Carol Reed

Entrevista espublizada n'Encountering Directors (ochobre de 1971)

C.T.S.: Afirmó usté que gran parte de la maestría d'El tercer home allúgase nos sos esteriores. Si d'usté dependiera, ¿rodaría siempres n'esteriores?

C.R.: Sí. Tuvi qu'enfrentame a una poderosa oposición pa viaxar a Viena con El tercer home. Naquella dómina, unu nun llevaba a los actores de viaxe. Pero ehí tenemos un exemplu d'hasta qué puntu esti negociu ta apoderáu pol dineru. Si tienes cinco selmanes pa rodar esteriores, sabes que tienes de consiguir rodar tolos tos planos nesi períodu. Teníemos una unidá diurna y una nocherniega. Los actores qu'utilizábemos de nueche nun trabayaben de día, y viceversa. Trabayábemos d'ocho de la tarde a cinco de la madrugada. A les cinco, díbemos pa la cama, llevantábemos a les diez, trabayábemos cola unidá de día hasta les cuatro y depués volvíemos chanos hasta los ocho. D'esa manera consiguíemos facer el doble de trabayu na mesma cantidá de tiempu. Resulta un pocu agobiante, pero ye meyor eso que nun consiguir tolo que quies y tener qu'iguar depués nel estudiu. [...]

C.T.S.: Anque delles de les sos películes son estraordinaries, escasamente fuxen de los métodos habituales... con una esceición. A usté gústen-y los finales desdichaos. ¿Tratase d'una rebelión consciente contra les fórmules comerciales?

 C.R.: Unu siempres tien que facer lo que-y presta, y confiar en que lo que-y presta sía, amás, comercial. Solía recibir numberoses crítiques polos finales murnios de les mios películes. En cierta dómina pensábase que toles hestories teníen de terminar con un besu por que la xente colara contenta, pero cunto que nun teníen esi efectu. Una película tien de terminar como tenga de terminar. Creo que nada nesta vida tien un final “correctu”. [...] Graham Greene quería que Joseph Cotten adelantrara a Valli con esi coche; asina, la película podría terminar cola pareya caminando pela carretera. Pero yo insistí en qu'ella pasara de llargu. 

C.T.S.: ¿De quién foi la idea de contratar a Orson Welles pal papel de Harry Llime?

C.R.: Foi mía. Una nueche taba cenando con Orson. Acababa de recibir la sinopsis de Graham Greene, y pensé que taba bien, polo que-y dixi a Orson qu'había nella un papel maraviyosu pa él. Quixo lleelo, pero díxi-y: “Escucha, el guión nun ta llistu tovía, pero toi seguro que te va gustar, y eso que nun apaeces hasta aprosimao la metá”. Y él repunxo: “Personalmente, preferiría apaecer al cabu de les dos terceres partes”. En pasando una selmana llegóme la revisión de Greene, y aceptéla. Daquella, David Selznick quería que rodara Tess of the D'Urbevilles, lo que nun me pruyía enforma. Tenía un guión qu'a los dos paecíanos abondo malu, polo que-y dixi que lo fixera revisar y que mentanto me dexara siguir con El tercer home, yá que se trataba de daqué que podíamos espachar con facilidá. Díxi-y que quería a Orson Welles y a Cotten, del que sabía que tenía un contratu con Selznick, al igual que Valli. “Cuenta con Cotten y con Valli”, dixo él, “pero non con Orson”. [...] Selznick quería de toes toes que Noël Coward fixera'l papel de Harry pero, ta claro, eso fuera un desastre. Siguíamos aldericando ensin llegar a nenguna conclusión. Cuando empecé a rodar la película, Selznick entá siguía pensando en Noël. Sicasí, a Alexander Korda, el productor, nun-y importaba, polo qu'a la fin consiguí a Orson. [...] 

VIENA, LA OTRA PROTAGONISTA DE 'EL TERCER HOME'

Nun hai alcuerdu unánime sobro'l personaxe que captura más atención del espectador n'El tercer home, si bien la mayoría coincide n'Orson Welles col so perllográu papel d'un cínicu Harry Lime. Otra xente defínese por Joseph Cotten o por Alida Valli. Háilos que se queden con Trevor Howard. Pero, de toes maneres, en dalgo coinciden tolos que ven la película, nel protagonismu de la ciudá de Viena. Parcialmente destruyida y apinada d'escumbriaes y edificios quebraos, la capital austríaca supunxo l'escenariu perfechu pal thriller de Carol Reed, con esi xeitu ente realista y al empar escuru. La Viena d'El tercer home aporta l'ambientación más afayaíza pa describir a la Europa de posguerra y a piques d'entrar na Guerra Frío.

Na dómina en que se plantega la fechura d'esti film dase un fechu bien relevante; la Segunda Guerra Mundial camudara la vida de munchos directores, productores y escritores, como fuera'l casu de Carol Reed, que trabayara na unidá de documentales del exércitu británicu, mentantu que'l novelista Graham Green fuera espía contratáu pol serviciu d'intelixencia del mesmu país. Taba claro que la fin de la contienda, en 1945, diba ser bona fonte de trames pa la lliteratura y el cine.

El proyectu d'esta película financiábenlu l'estadounidense David O. Selznick y l'húngaru Alexander Korda. El primeru quería rodar en Berlin pero según Reed yera meyor aprovechar la escenografía natural de la posguerra, y la capital del Reich taba nun estáu perllaceriosu. Entós Korda propunxo Viena, una ciudá que se facía de toes toes a los pidimientos de la hestoria a cuntar y que, per otra parte, coincidía col Berlín derrotáu nel aspectu de la cuatripartición alministrativa del territoriu. El tiempu certificó lo acertao d'esa decisión.

GRAHAM GREENE Y LA SO NOVELA PA SER VISTA

Graham Greene

Una trama apinada de misteriu alrodiu d'un asesinatu fain qu'esta novela-guión sía una clásicu, tantu de la lliteratura como del cine. El tercer home tien un conxuntu d'elementos qu'ayuden a dibuxar de primeres esta obra de Graham Greene. El mesmu títulu yá ye enigmáticu.

Greene asegurara qu'esta novela nun la escribió pa ser lleída, sinon pa ser vista. Alexander Korda pidiera-y al escritor un guión pa Carol Reed. Greene daquella dixo "pa mi ye imposible escribir el guión d'una película ensin escribir enantes un relatu. Una película nun depende solo d'una trama argumental, sinón tamién d'unos personaxes, d'un talante y un clima, que me paecen imposibles de captar per primera vez nel insípidu esbozu d'un guión convencional".

Greene y Reed nun tuvieron d'alcuerdu sobre l'acabu de la hestoria. Mientres Greene aseguraba que la xente diba aburrise y nun esperaría a ver cómo Holly caminaba tantu tiempu solu y aconceyaba cola moza a la salida del cementeriu, Reed caltenía que la xente impresionaríase viendo que la moza colaba en silenciu, tres del entierru de Harry. Greene afirmó qu'esta midida del director "namás lu convenciera a medies" pero, lo que son les coses, el final d'El tercer home ta consideráu por munchos como la meyor secuencia final de la hestoria del cine.