MAR BUELGA, L'ALIDA VALLI N'ASTURIANU

L'Anna (Alida Valli) d'El tercer home fala n'asturianu per aciu la voz de l'actriz xixonesa Mar Buelga, qu'amás ye ilustradora y monitora en dellos centros educativos. Ye tamién miembru de la Compañía Asturiana de Comedias y profesora de teatru infantil. El so doblaxe empata perfechamente col personaxe de Valli, dándo-y a la estrella italiana un falaxe y una interpretación llariegos que-y presten enforma a los espectadores, como quedó patente nel estrenu del sábadu pasáu.

D'otra manera, Mar Buelga dio les sos opiniones sobro'l doblaxe nun artíuculu dedicáu pol selmanariu Les Noticies al versionáu d'El tercer home. Comentó que ye un llabor qu'engancha, que "cuando acabes, quies más". De seguro que Mar Buelga podrá amosar les sos cualidades interpretatives y como dobladora en vinientes proyectos de Gonzali Producciones, nuna xera que-y parez bien importante pa la normalización de la llingua.

Más información en Mar Buelga ilustradora

TREVOR HOWARD NA VOZ DE NORBERTO SÁNCHEZ

Norberto Sánchez, mientres el doblaxe d'El tercer home

Norberto Sánchez ye miembru de la renomada Compañía Asturiana de Comedias. Tien fecho trabayos asgaya nel mundu de la interpretación, sía nel teatru o con participaciones en películes como You are the one, de José Luis Garcí, y Mortadelo y Filemón, de Javier Fesser. Collaboró en dellos curtiometraxes, anuncios publicitarios y publirreportaxes d'empresa. Na TPA trabayó como actor principal nun capítulu de la serie Sección de homicidios. Agora, ye la voz del actor inglés Trevor Howard (Mayor Calloway) na versión n'asturianu d'El tercer home.

En declaraciones al semanariu Les Noticies, Norberto Sánchez faló sobro esti doblaxe y definiólu como "dalgo que ye distinto y más complicao que tar delantre del públicu, pero toi mui arguyosu del resultáu". Pa él fain falta más proyectos como ésti p'ayudar a los actores del país "pero tendríen que ser fechos con profesonalidá y de forma seria, porque dalgunes de les coses que se fixeron n'Asturies nesi sentíu yeren de tipu humorísticu. Sería perfecto que se fixeren más coses como esta. Amás, cuento que podríen llegar a un públicu bien ampliu".